La perla tanter las operas da chombra «The Bear» da William Walton (tenor il toc d’ün act da Tschechow) es üna capodouvra per trais persunas chi impreschiunescha tant musical- sco scenicamaing e tschüffa il public cun umur, tempo e profuondità da la prüma fin l’ultima secunda.

«The Bear» vain inramà in ün’inscenaziun chi giouva in ün grandhotel cun tuot sias famusas istorgias laschond perfin reviver ün cas chi d’eira fingià lönch crodà in invlidanza. Il toc as preschainta sül palc sco operetta criminala «Grandhotel XY ungelöst».

I giovan e chantan ils listess trais acturs, ma quista jada na dürant il temp da Tschechow, mobain l’on 2009, 20 ons davo l’incendi da l’hotel da cura legendar «Zum Bären».

La primaudiziun scenica da quista «operetta criminala» invida cun musica da Strauss, Verdi, Donizetti fin Aretha Franklin e bler otra ad üna sairada cun istorgias ed anecdotas chi’s basan sün evenimaints reals ed inventats dal Scuol Palace ed oters grandhotels.

Ils scumpigls intuorn l’amuranza in trais e’ls giasts d’hotel illusters e las tunas intuorn il passà e l’avegnir da l’hotel s’intensiveschan e’s derasan in d’üna jada sco ün fö nervus …. Po l’anteriur directer d’hotel salvar sia reputaziun e chattar oura chi chi’d es stat l’incendiader? ....Che rolla giova la guaivda chi chanta e seis amant d’üna jada chi cumpara e metta tuot suotsura? As laschai tour cun vo in ün muond plain intrigas, voutas surprendentas e musica fascinanta ed as laschai persvader svessa, sco public, da las retscherchas fattas sül lö.